Oihana Vesga

Oihana dantzari eta sortzailea da. Bere sormen koreografikoak mugimendutik abiatzen diren einean, testuaren eta kantuaren baliabideak uztartzen ditu. Gorputza du espresioaren ardatz, eta akzio konkretuek gure iruditegi eta pertzepzioan duten oihartzun multiplea behatzean ipintzen du arreta.

Sortzaile lanetaz gain, dantzari eta interprete gisa garatzen du bere praktika, beste artistekin elkarlanean unibertso propioa aberastuz.

Biarritzeko Maurice Ravel Kontserbatorioan eta Londreseko London Contemporary Dance School-ean burutu zituen goi mailako dantza ikasketak, azken honetan dantza garaikideko gradua eta ondoren koreografiako masterra eginaz. Dantzari gisa hainbat koreografo eta konpainiekin egin du lan 2012an ibilbide profesionalari ekin zionetik, Richard Alston, Martin Lawrance, Simona Bertozzi, Joe Moran, Rick Nodine, Jeannie Steele, Didy Veldman atzerrian, eta Alberto Cortes, Blanca Arrieta, Olatz de Andres, Iker Arrue, Myriam Perez Cazabon, La Intrusa eta Marina Suarez estatu mailan, besteak beste. Koreografiari dagokionez, sei obra sortu ditu 2017an Motivaction izeneko lehen lana sortu zuenetik. Nerea Gurrutxagarekin batera Mari Zaunka kolektiboko kidea da. 2024an Gipuzkoako Dantza Profesionalen Elkarteak dedikazioari saria eskaini zion, haren ibilbidearen errekonozimentu gisa.